البلد بتتحرك...قوم واشتغل

مش عارف ليه من يوم ما الثوره ما قامت والحكومه كل كام سنه يغيروا فى تفكيرهم ويرجعوا من اول و جديد.
مش هاقول انهم امموا املاك الاسر المصريه وبعد ما اتنهب معظمها رجعوها,ولا هاقول انهم بعد ما عملوا قانون الملكيه الزراعيه واعدوا يقللوا فيها كل شويه من 200 الى 150الى 100الى50 رجعوا رجعوا_بتشديد الجيم_ كل الاراضى اللى اتأممت لاصحابها بعد ما دمروا حلم الفلاحين الغلابه اللى عاشوا فى فرحه خير الارض كم سنه وغيره وغيره وغيره.
وبعد فتره اعدوا ينادوا بالتعليم واهميه التعليم مع ان التعليم الحالى يعنى لو ان الواحد طلع منه بيعرف يقرأ ويكتب يبقى كتر خير اهله.
انا عرفت واحد كانوا بيحاولوا يغشوشوه وهو فى 3 اعدادى عشان طبعا ابوه كان الناظر وما كان عارف حتى يكتب اللى بيغششهولوه.
المهم انهم بعد كل السنين دى من المناداه بالتعليم وخصوصا التعليم العالى وان كل واحد لازم ياخد شهاده تنفعه وان الرجل المناسب فى المكان المناسب مع انى عمرى ما شفت واحد فى المكان المناسب وكل الكلام اللى وجعوا دماغنا بيه جم دلوقتى و بعد ما فشلوا فى انهم يلاقوا وظائف للجامعيين المتخرجين بدأوا يوجوعوا دماغنا باعلانات عن الشباب الفاشل اللى هو السبب فى بطالته وان هو اللى اعد على القهوه مع ان البلد بتتحرك, بتتحرك على فين مش عارف _فى حيطه ان شاء الله_وعايزينهم يقوموا ويتحركوا ودا لانهم خايفين على مصلحتهم اللى هم ضيعوها من الاساس وعايزينهم يقوموا يروحوا و يشتغلوا قال ايه خير اللهم اجعله خيرعمال فى مصانع....!
المشكله مش انه يشتغل عامل فى مصنع لان الشغل مش عيب , المشكله ان العاطلين خريجى تجاره وعلوم وسياحه وهندسه واقتصاد وتربيه وأداب وكمان طب وصيدله عايز أعرف دول يروحوا يشتغلوا فى المصانع ايه بالضبط .
المشكله انهم مايعرفوش و ما اتعلموش طب ليه ما قالوش كده من زمان ونادوا ان الناس تتجه للتعليم الفنى لان البلد محتاجه عمال وفنيين ومهاريين ليه مادربهومش على العمل بالمصانع .
انا مش عارف هما ناويين يعملوا فى الناس ايه اكتر من كده المصيبه الكبرى كمان انك لو سألت اى خبير عن مصر هيقولك ان مصر مش دوله صناعيه انما دوله زراعيه وانها عمرها ما هتنجح كدوله صناعيه فى الاساس ولكن لاحياه لمن تنادى , الناس بطلت تزرع أكلها وراحت تدور على حاجات تانيه ماتنفعهومش ولقوا ان الاسهل يستوردوا أكلهم وشربهم أريح واللى زاد وغطى بقى ان المصرى دلوقتى يتكسف يقول انا فلاح و الواحد لما يحب يشتم واحد يقوله يا فلاح

ازاى ومافيش واحد مصرى ابن مصرى الا وابوه وجده واللى جابوا جد أبوه... فلاح.
انما نعمل ايه البلد بتحرك...ولازم تركب القطر...امال القطر يتقلب بمين غيرنا....؟ا

لك الله يا مصر....